• எங்கள் வீடு முழுவதும் நிலா வாசனை

எங்கள் வீட்டிற்குள் நுழைந்தாலே அந்தச் சிறிய நிலாவின் வாசனைக் கமழும். அங்கே இங்கே ஓடிக் கொண்டும், செல்பேசியில் பேசியபடி நடந்து கொண்டும் இருக்கும் அந்த நிலாவின் வாசனையால் நாங்கள் திக்குமுக்காடித்தான் போவோம் சில நேரங்களில்.

யாரைப் பார்த்தாலும் அழகிய ஆங்கிலத்தில் (என் மகள் பேசுவதால்தான் ஆங்கிலமும் அழகானது) ஹாய் என்று சொல்லி அசர வைக்கும் விதம்.

நன்றி கூறி கைகுலுக்கும் தொனியில் தொழிலதிபர்களையும் விஞ்சிவிட்ட அணுகுமுறை.

எந்தத் தவறையும் செய்வதற்கு முன்பு அவரைக் கண்காணிப்பவரை நோக்கி போலியாய் ஒரு சிரிப்பை சிரித்துவிட்டுத்தான் தனது காரியத்தை துவக்குவாள். அதில் பழுத்த அரசியல்வாதிதான் அவள்.

ஆம் முக்கியமாக இசை, நடன ரசிப்பு அதிகம்... எங்கு பாட்டு கேட்டாலும் கைத்தட்டலுடன் ஓடிச் சென்று நடனமாடி அவளது பாட்டையும், நடனத்தையும் ரசிக்கும்படி செய்துவிடுவாள்.

எதற்கும் அசராதவள், அவள் பாட்டியைத் தவிர யாருக்கும் பயப்படாதவள்...

ரஜினிகாந்த் ஸ்டைலில் குட்நைட் சொல்லும் வரை ஓயாமல் ரசித்துக் கொண்டிருக்கலாம் அவளை அந்த முழு நிலவை.

இப்போது அவள் கத்துக் கொண்டிருக்கும் இரண்டு பாடல்கள்.... நிலா நிலா ஓடி வா மற்றும் ரிங்கா ரிங்கா ரோஸஸ்.

இந்த பாடல்கள் இவ்வளவு அருமையானதா என்பதை அவள் பாடிக் கேட்டால்தான் தெரியும் உங்களுக்கு.

அவள் உடுத்திக் களைந்த அழுக்குத் துணிகளை, அழுக்குத் துணிகள் இருக்கும் இடத்தில் சென்று சேர்த்துவிடும் பொறுப்புணர்ச்சிக்கு எத்தனை விருதுகள் வேண்டுமானாலும் கொடுக்கலாம் அந்த நிலாவுக்கு.

இப்போதைக்கு இவ்வளவே.... இன்னும் சற்று நாளில் சந்திக்கலாம் மேலும் தகவல்களுடன்.